Нишони биринҷии Комроншоҳу Саидҷалол дар Кувайт

Душанбе, 15.05.2015. (АМИТ «Ховар», Меҳрони Қурбон).-Паҳлавонони тоҷик дар мусобиқаи қаҳрамонии дзюдои Осиё ҷои сеюмро касб намуда, медали биринҷиро ба  даст  оварданд. Дар ин мусобиқа, ки  рӯзҳои  13-14 май дар Кувайт баргузор шуд, Комроншоҳи Устопириён дар вазни 90 ва Саидҷалол Саидов дар вазни 100 кг мақоми сеюмро ишғол карданд. 
Ёдовар  мешавем, ки  Комроншоҳ дар ду рақобати аввал ҳарифонаш — Муҳаммад Махтуб (Фаластин) ва Ислом Бозбоев (Қазоқистон)-ро шикаст дода, дар қисмати ниманиҳоӣ аз паҳлавони ҷопонӣ Даики Нишияма мағлуб шуд. Сипас,  қувваозмоӣ бо паҳлавони чинӣ Хинзао Ченро ба нафъи худ анҷом дода, дар мақоми сеюм нишаст.
Паҳлавони  дигари  тоҷик Саидҷалол Саидов дар даври аввали қувваозмоӣ  рақиби чиниаш Кай Ҳуро мағлуб карда, дар даври дувум аз Максим Ракови қазоқистонӣ шикаст хӯрд. Баъдан рақиби эронияш Ҷавод Маҳҷубро ноком гардонида, дар рақобатҳо барои ҷойи севум Рамзиддин Саидови ӯзбекистониро мағлуб сохт.
Хотиррасон  менамоем, ки дар мусобиқаи қаҳрамонии дзюдои Осиё ба ҷуз Комроншоҳу Саидҷалол, Тоҷикистонро панҷ варзишгари дигар намояндагӣ карданд, ки ба дарёфти медал мушарраф нагаштанд.