Озмуни «Зани намунавӣ»

Душанбе, 25.05.2015. (АМИТ  «Ховар», Лайло Тоирӣ).-Чанде қабл дар  Коллеҷи тиббии ҷумҳуриявии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бахшида ба соли оила озмуни «Зани намунавӣ» баргузор гардид.
Дар озмун 4 нафар омӯзгорзан аз рӯи иҷрои 9 шарт: саломнома, қироати шеър аз ашъори шоирони классикии форсу тоҷик, намоиш додани ҳунарҳои ғайримуқаррарии худ, тарзи тунук намудани хамир ва буридани угро, тарзи омода намудани хӯриши тезтайёр, бастани галстук, ороиши мӯйи сари духтарон, хондани суруди алла, посух ба суолҳои ҳакамон оид ба соли оила иштирок намуданд.
Омӯзгорон аз ҳар ҷиҳат ҳунарҳои худро намоиш дода, сазовори баҳои баланди доварон гаштанд. Дар  ҷараёни озмун, аз ҷумла  дастаи ҳаваскорон аз ҳисоби донишҷӯёни коллеҷ ҳунарнамоӣ намуданд.
Гарчанде баҳо додан ба ҳунари омӯзгорон хеле мушкил буд, вале бо як овоз бо гирифтани 175 хол пирӯзӣ насиби омӯзгор Фарангис Назарова гардид.Ҷои дуюм насиби Фарзона Шарипова, ҷои сеюм насиби Кибриё Эмомова ва ҷои чорум насиби Эътибор Султонова гардид.
Озмун хеле хотирмон гузашт.