Сабабҳои фавти Ш.Қурбонов муайян карда мешавад

Душанбе, 21.05.2015. (АМИТ «Ховар», Лайло Тоирӣ).- 18 май дар сохтмони яке аз биноҳои серошёнаи шаҳри Бузулуки вилояти Оренбург ҷасади марди 52 сола, шаҳрванди Тоҷикистон пайдо гардид. Ба гуфтаи корманди намояндагии Вазорати меҳнат, муҳоҷират ва шуғли аҳолии ҶТ дар ФР оид ба муҳоҷират, марҳум сокини деҳаи Шӯроби ноҳияи Ҳисор Қурбонов Шаҳобиддин Тошмуродович будааст. Назар ба иттилои сухангӯи намояндагӣ Иброҳим Аҳмадов, марҳум сохтмончӣ буда, бригадааш иборат аз 20 нафар муҳоҷирони меҳнатии асосан сокинони ноҳияҳои Ҳисор ва Рӯдакӣ буда, дар ширкати сохтмонии Ҷамъияти масъулияташ маҳдуди «Уралстройсервис» кор мекардааст. Алҳол шуъбаи байниноҳиявии раёсати тафтишоти шаҳри Бузулук барои муайян кардани сабабҳои ин воқеа чора мебинад.