Шиносоии сафир бо фаъолияти МОИ «Суғд»

Душанбе, 14.05.2015. (АМИТ «Ховар»).- 13  май сафири  Исроил дар  Тоҷикистон Кармела Шамир бо  муовини  якуми роҳбари маъмурияти Минтақаи  озоди  иқтисодии (МОИ) «Суғд» Ӯктам  Норматов мулоқот  анҷом  дод. 
Назар  ба   иттилои  МОИ  «Суғд», мақсад  аз ташрифи  дипломати  Исроил роҳандозии  ҳамкорӣ  миёни  Тоҷикистон  ва  Исроил  буд. 
Ҷонибҳо  самтҳои фаъолиятеро  муҳокима  намуданд, ки  иштироки  сармоягузорони  Исроил  ва  мусоидати ин  кишвар  ба  онҳо  имконпазир  аст. Зикр  шуд, ки  сафари тоҷирони Тоҷикистон  ба  Исроил барои  шиносоӣ  бо  вазъи сармоягузорӣ,  табодули таҷриба  ва ҷустуҷӯи  роҳҳои  барқарор намудани  равобит барои ҳамкории дуҷониба метавонанд  яке  аз  василаҳои  густариши ҳамкорӣ гарданд.
Кармела  Шамир аҳамияти  тарбияи мутахассисони  варзидаро, ки  имрӯз бисёр кишварҳои  тараққиёбанда  кифоят накардани онҳоро ҳис  мекунанд, ба таври  махсус  зикр намуд. Барномаҳои  махсуси байналмилалӣ, ки онҳоро  раёсати ҳамкории байналмилалии  ВКХ  Исроил  дар  амал  татбиқ  менамояд,  доираи  васеи  чорабиниҳои  муфидро  фаро  мегиранд.
Қобили  зикр  аст, ки  сафири  Исроил дар  Тоҷикистон ҳамчунин  бо  раиси  вилояти  Суғд  Абдураҳмон  Қодирӣ  вохӯрда,  аз   шаҳри  нави  Сайҳун,  корхонаи  муштараки абрешими  «ВТ- силк» — и  Тоҷикистону  Ветнам  ва ҷойҳои шоёни  диққати  шаҳр  боздид  намуд.