Ширкати осоишгоҳи “Баҳористон” дар намоишгоҳи туристӣ

 
Душанбе, 18.05.2015. (АМИТ «Ховар»). — Муассисаи пешсаф миёни осоишгоҳҳо ва хизматрасониҳои меҳмонхонаҳо, инчунин дар самти табобату беҳдошти саломатӣ дар намоишгоҳи туристӣ, ки аз ҷониби Раёсати ҷавонон, варзиш ва саёхии Маќомоти иҷроияи ҳокимияти давлатӣ дар вилояти Суғд доир шуд, ширкат намуд.
Дар намоишгоҳ хизматрасониҳои 6 осоишгоҳи маъруфтарини вилоят ва зиёда аз 10 ширкати сайёҳӣ ба маърази намоиш гузошта шуд.
Директори генералии ҶДММ “Осоишгоҳи Баҳористон” Абдумалик Содиқов зарурияти рушди туризми дохилиро зикр намуд. “Тоҷикистон дорои табиати дилфиребу нотакрор ва мавзеъҳои зиёди таърихӣ мебошад. Ва истифодаи самарабахши ин неъмат зарур аст. Мо, дар навбати худ, тамоми шаҳрвандони мамлакатамонро ба осоишгоҳи “Баҳористон” баҳри истироҳат ва беҳдошти саломатӣ даъват менамоем”,-гуфт ӯ.
Дар доираи намоишгоҳ миёни ҷамъомадагон озмуни рақси беҳтарин доир гардид. Ғолиби омзмун хонандаи курси аввали колеҷи тиббии шаҳри Хуҷанд Зебоҷон Ҳошимова соҳиби роҳхати панҷрўза ба осоишгоҳи “Баҳористон” гардид. Роҳхатро ба ғолиб муовини директори генералии осоишгоҳи “Баҳористон” Исмоил Исмоилов супурд.