Суғд: “Зумрад” соҳиби ҷоизаи “Qualitu Summit” гашт

Хуҷанд. 27.05.2015. (АМИТ “Ховар”, Абдуаҳад Шарифзода).-Иштирокчии 29-умин “Конвенсияи байналмилалӣ оид ба сифат дар соли 2015” — Осоишгоҳи “Зумрад”-и шаҳри Исфара соҳиби ҷоизаи байналмиллалии тиллоии “Qualitu Summit” гаштааст.
Маросими ҷоизасупорӣ дар шаҳри Ню-Йорк-и ИМА, ки дар он намояндагони 72 ширкати ҷаҳонӣ иштирок доштанд,  доир гашта, Осоишгоҳи “Зумрад” дар номгӯи “Барои сатҳу сифати олии хизматрасонӣ” ҷои пешсафро касб намуда, ҷоизаи мазкурро мушарраф гаштааст. 
Дар ин бора  зимни ифтитоҳи  бинои меҳмонхонаи  тозабунёд  бо номи «Соҳилоро», ки дар шафати осоишгоҳи “Зумрад”, ки аз ҷониби  як соҳибкори маҳаллӣ бунёд шудааст, директори генералии осоишгоҳи «Зумрад» Зафар Олимов хабар дод.. Мутобиқ ба маълумоти  З.Олимов, меҳмонхонаи  «Соҳилоро» аз 10 ҳуҷра иборат буда, барои истифодаи 20 нафар меҳмону истироҳаткунандаи осоишгоҳ пешбинӣ шудааст.
Бояд хотиррасон кард, ки қаблан низ дар замони шӯравӣ осоишгоҳи «Зумрад»  аз осоишгоҳҳои намунавӣ ва дорои шӯҳрати хосса ба ҳисоб рафта, он чандин маротиба ғолиби озмунҳо байни осоишгоҳҳои  умумииттифоқӣ гаштааст.