Таъмини муҳоҷирони экологӣ бо қитъаи замин

Душанбе, 20.05.2015. (АМИТ «Ховар», Лайло Тоирӣ).-Дар ҷамоати деҳоти «Тугарак» ва деҳаи Хоҷамуъмини ноҳияи Восеъ ба 10 оилаи муҳоҷири экологӣ барои сохтмони манзили истиқоматӣ қитъаи замини назди ҳавлигӣ ҷудо шуд, ки дар айни замон онҳо ба сохтмони мазили зисташон шурўъ намуданд. Бино ба иттилои сухангӯи Хадамоти муҳоҷират А. Қодирӣ, барои танзими раванди муҳоҷиркунонии аҳолӣ ва аз минтақаҳои хавфноки экологӣ ба мавзеъҳои бехавф кўчонидан комиссияи дахлдор таъсис шудааст, ки бо сокинон вохўрда, дар байни онҳо пайваста корҳои тарғиботӣ-фаҳмондадиҳӣ бурда, барои сари вақт ба ҷойҳои бехавф кўчонидани аҳолӣ кўшиш ба харҷ дода, 10 хоҷагие, ки ба кўчонидан ба ҷойҳои бехавф дар соли 2015 эҳтиёҷ доранд, мавриди омўзиш қарор дода шуд. Бояд зикр намуд, ки дар натиҷаи санҷиш маълум гардид, ки муҳоҷирони экологии ноҳия хулосаи Саридораи геологияи назди Ҳукумати Ҷумҳурии Тоҷикистонро доро мебошанд.