Устондори Қоҳира сафири Тоҷикистонро ба ҳузур пазируфт

 Душанбе, 27.05.2015 (АМИТ «Ховар»).- 26 майи 2015 устондори Қоҳира Ҷалол  Саид сафири Тоҷикистон дар  Миср Хусрав Нозириро ба ҳузур  пазируфт. Дар мулоқот масъалаҳои  гуногуни мавриди эҳтимоми муштарак  баррасӣ гардиданд. Дар партави густариши муносибатҳои ҳасанаи дуҷонибаи Тоҷикистону Миср аҳамияти барқарор намудани робитаҳои ҳамкорӣ байни пойтахтҳои ду кишвар таъкид шуд. Қоҳира, ки ҳоло беш аз 10 млн нафар аҳолӣ дорад, дар соли 969 дар канори рӯди Нил бунёд гардида, дорои осори фаровони арзишманди таърихӣ мебошад. Мутафаккири бузурги тоҷик Носири Хусрав дар қарни XI мелодӣ аз пойтахти Фотимиён боздид намуда, Қоҳираро дар “Сафарнома”-и худ шаҳре камназир меномад.