Вохӯрии С.Аслов бо соҳибкорони Ҳиндустон

Душанбе, 14.05.2015 (АМИТ «Ховар»).- 13 майи соли 2015 вазири корҳои хориҷии Ҷумҳурии Тоҷикистон С. Аслов бо намояндагони бонуфузи доираҳои соҳибкорӣ ва сармоягузорони Ҳиндустон мулоқот намуд. Ин чорабинӣ бо ташаббуси Сафорати Ҷумҳурии Тоҷикистон дар Ҳиндустон ва раҳбарияти ширкати CHL Limited-и Ҳиндустон баргузор гардид.
С.Аслов оид ба сиёсати иқтисодии хориҷии Тоҷикистон ва тадбирҳое, ки Ҳукумати кишвар ҷиҳати беҳтар намудани фазои сармоягузорӣ ва соҳибкорӣ дар кишвар амалӣ мекунад, сухан гуфт.  Дар ин росто имконияту роҳҳои тавсеаи ҳамкориҳои Тоҷикистону Ҳиндустон дар соҳаҳои иқтисодию тиҷоратӣ ва сармоягузорӣ махсус таъкид гардиданд.  
Аз ҷониби намояндагони доираҳои соҳибкорӣ ва сармоягузорони Ҳиндустон алоқамандии воқеӣ ба татбиқи муштараки лоиҳаҳо дар соҳаҳои афзалиятноки иқтисодиёти Тоҷикистон зоҳир шуд. Барои тақвияти беш аз пеши ҳамкориҳо ва баррасии лоиҳаҳои муштарак пешниҳод шуд, ки дар рӯзҳои наздик сафари доираҳои соҳибкории Ҳиндустон ба Ҷумҳурии Тоҷикистон сурат гирад.
Дар ҳошияи мулоқоти С. Аслов бо доираҳои соҳибкории Ҳиндустон Сафорати Ҷумҳурии Тоҷикистон дар ин кишвар ҷолибияти Тоҷикистонро барои сармоягузориҳои хориҷӣ муаррифӣ намуд.