Баррасии тӯлонии лоиҳаи қонун дар Парлумон

Душанбе, 24.06.2015.(АМИТ „Ховар“, Марзия Саидзода).- Баррасии  лоиҳаи Қонуни конститутсионии  Ҷумҳурии Тоҷикистон „Дар бораи  шаҳрвандии Ҷумҳурии Тоҷикистон“ имрӯз дар палатаи поёнии Парлумони мамлакат хеле тӯлонӣ- 1 соату 26 дақиқа ҷараён гирифта, бо вуҷуди норасоиҳо дар матни лоиҳаи қонуни конститутсионӣ ва вуҷуд доштани духӯрагӣ дар баъзе моддаҳо, он  дар таҳрири нав қабул  гардид.
Зариф Ализода -Ваколатдор оид ба ҳуқуқи инсон дар Ҷумҳурии Тоҷикистон зикр намуд, ки  лоиҳаи қонуни конститутсионии амалкунанда 20 сол муқаддам, аниқтараш моҳи ноябри  соли 1995 қабул гардидааст. Ва тарҳи нави он аз соли 2007 дар асоси пешниҳоди Вазорати корҳои хориҷии ҷумҳурӣ мавриди омӯзиш қарор дорад. Дар таҳрири нав қабул намудани он ба манфиати ҷомеа ва арзишҳои демократӣ мебошад, зеро тибқи  қонуни амалкунанда агар касе,  ки дар қаламрави Ҷумҳурии Тоҷикистон панҷ сол зиндагӣ намекунад,  шаҳрвандиро аз даст медиҳад. Агар мо инро татбиқ кунем, ҳазорҳо нафарро бояд хориҷ кунем, афзуд. З. Ализода.
Масъалаи дигар ин таъмини амнияти миллист. Тибқи тарҳи нави ин қонуни конститутсионӣ шахсоне, ки дар таъқиби ҷиноятианд, ё ҷиноятҳои вазнин содир кардаанд, аз гирифтани шаҳрвандии Ҷумҳурии Тоҷикистон маҳруманд. Инчунин яке аз омилҳои гирифтани  шаҳрвандии Ҷумҳурии Тоҷикистон донистани  забони давлатӣ дар сатҳи муошират мебошад.  Лоиҳаи нави қонуни конститутсионӣ раванди гирифтани шаҳрвандиро дар қаламрави Ҷумҳурии Тоҷикистон содда намуда, қонуни амалкунандаро ба талаботи замон ва ҷомеаи Тоҷикистон мутобиқ мегардонад. Ҳадафи асосии қабули қонуни конститутсионӣ дар таҳрири нав ба ҳифзи манфиатҳои  миллати тоҷик дар дохил ва хориҷи кишвар, инчунин халқҳое, ки муқими Тоҷикистонанд, нигаронида шудааст. Лоиҳаи қонуни конститутсионӣ аз 7 боб ва 44 модда иборат буда,  ба меъёрҳои байналмилалӣ мутобиқ гардонида шудааст.