Файзи истиқлол аз ваҳдат аст

Душанбе 26.06.2015 (АМИТ «Ховар», Фарзонаи Давлат).- Бо ташаббуси Ташкилоти ҷамъиятӣ-байналмилалии Фонди “Диалоги Авруосиё” чанде пеш китоби “Ваҳдат ва раванди гуфтугӯи тамаддунҳо” нашр гардид.  Китоби мазкур дар партави асару мақолаҳо ва суханрониҳои Президенти мамлакат Эмомалӣ Раҳмон таҳия шудааст.

Дар боби аввали китоб зери унвони “Ваҳдат — омили муттаҳидсози миллат” суханрониҳои Сардори давлат Эмомалӣ Раҳмон оид ба ваҳдат, сулҳ ва гуфтугӯи тамаддунҳо ҷой гирифтааст. 

Дар боби дуюми китоб мақолаҳои олимони тоҷик оид ба нақши барҷастаи Президенти мамлакат муҳтарам Эмомалӣ Раҳмон дар тарғибу тавсифи ваҳдат, таҳаммулгароӣ ва фарҳанги сулҳ ҷой дода шудаанд. Мақолаҳои Нодир Одилов “Роҳбаре бо хиради хусравонӣ”, Мирзошоҳрух Асрорӣ “Ваҳдат — арзиши муқаддасу азиз”, Меҳмон Бахтӣ — “Файзи истиқлол ва ваҳдат” ва дигарон дар ин бобат таҳия шудаанд.

Роҳбари Ташкилоти байналмилалии фонди “Диалоги Авруосиё” Эмсал Коч дар муқаддимаи китоб навиштааст: “Кӯшишҳои Сардори давлат, муҳтарам Эмомалӣ Раҳмон дар бораи расидан ба сулҳу ваҳдат манзури оламиён гардид. Имрӯз бо ифтихор метавон гуфт, ки Тоҷикистон мактаби таҷрибаи сулҳофарӣ гаштааст. Ҷомеаи ҷаҳонӣ ин таҷрибаро омӯхта, дар ҳалли бӯҳронҳои сиёсӣ истифода менамояд”.

Китоб ба 18-умин солгарди Ваҳдати миллии Ҷумҳурии Тоҷикистон бахшида шудааст.