Шоми имрӯз корхонаи «Кока-кола» ба кор медарояд

Душанбе, 26.06.2015.(АМИТ «Ховар», Марзия Саидзода).- Дар остонаи ҷашни Ваҳдати миллӣ дар шаҳри Душанбе   корхонаи нӯшокиҳои ғайриспиртии «Кока-кола» бо иқтидори истеҳсоли  100 миллион литр нӯшокӣ дар як сол ба истифода дода мешавад. Интизор меравад, ки шоми имрӯз дар маросими ба кор андохтани корхонаи мазкур Маҳмадсаид Убайдуллоев -раиси шаҳри Душанбе иштирок намояд.
Бино ба иттилои Шарофиддин Тағойбеков — мудири шуъбаи сохтмон ва ободонии дастгоҳи раиси шаҳри Душанбе корхонаи нӯшокиҳои ғайриспиртии «Кока-кола» бо маблағи 299 ҳазор сомонӣ  дар масоҳати 18 ҳазору 500 метри мураббаъ дар кӯчаи Ҷомии пойтахт  бунёд шудааст. ҶДММ «Кока-кола-нӯшокиҳои Тоҷикистон» фармоишгар ва  ҶДММ «Зафар-Иншоот» пудратчии корхонаи мазкур мебошанд. Баробари ба фаъолият шурӯъ кардани ин корхонаи истеҳсолӣ дар пойтахт 120 нафар бо ҷои корӣ доимӣ таъмин мегардад.