Толибон омили рӯ овардани мардум ба гиёҳхӯрӣ шудаанд

Душанбе, 29.06.2015. (АМИТ «Ховар», Тоҷиддин Аҳмадзода)-Ба сабаби камбуди ғизо, мардуми 14 шаҳру деҳоти таҳти тасарруфи Толибон дар Бадахшон гиёҳ мехӯранд.
Масъулони маҳаллӣ дар Бадахшон мегӯянд, ки дар ин деҳаҳо бинобар сабаби дастрасӣ наёфтан ба маводи ғизоӣ сокинони 14 деҳа ба гиёҳхӯрӣ рӯ овардаанд. Ба гуфтаи Гулмуҳаммад Бедор — муовини раиси вилояти Бадахшон як гурӯҳи муштараки ниҳодҳои ғайридавлатӣ барои баррасии вазъияти бошандагони  минтақаҳои мазкур ба ин вилоят рафтаанд ва баррасии онон нишон медиҳад, ки мардуми ин минтакаҳо ба камбуди ғизоӣ рӯ ба рӯ ҳастанд. Тибқи гуфтаи Бедор, ин манотиқ дар зери нуфузи Толибон мебошанд ва интиқоли кумакҳои инсонӣ аз сӯи давлат ба он ҷо душвор аст.