192 санҷиши аудиторӣ аз ҷониби Палатаи ҳисоби ҶТ

Душанбе, 23.07.2015. (АМИТ «Ховар», Лайло Тоирӣ).-   Палатаи ҳисоби Ҷумҳурии Тоҷикистон 192 санҷиши аудиторӣ дар вазорату кумитаҳо, субъектҳои хоҷагидори давлатӣ, ташкилоту корхонаҳо, Бонки миллии Тоҷикистон ва дигар муассисаҳои буҷетӣ гузаронид, ки дар қиёс ба ҳамин давраи соли сипаригардида 110 адад зиёд мебошад.
Бино ба иттилои роҳбари маркази матбуоти Палатаи ҳисоби ҶТ Шодӣ Сафарӣ, дар натиҷаи санҷишҳои аудитории ҳамин давраи соли 2014, зарари молиявӣ ба маблағи 14 млн. сомонӣ ошкор шуда, ин нишондиҳанда имсол ба 85 млн. сомонӣ расидааст, ки нисбат ба ҳамин давраи соли қаблӣ 70,9 млн. сомонӣ зиёд мебошад.
Аз маблағи умумии зарари молиявии ошкоргардида хароҷоти ғайриқонунии пулию молӣ 6 млн. 653 ҳазор сомонӣ, камомад ва тасарруфи воситаҳои пулию молӣ 1 млн. 363 ҳазор сомонӣ, изофанависӣ дар корҳои таъмиру сохтмонӣ 6 млн. 95 ҳазор сомонӣ, зарар аз фурӯш ва иҷораи амволи давлатӣ 792 ҳазор сомонӣ, талафи воситаҳои пулию молӣ аз бесарусомонӣ 29 млн. 84 ҳазор сомонӣ, маблағи кам ҳисобгардида ва рӯйпӯшнамудаи андозҳо 40 млн. 948 ҳазор сомонӣ ва маблағи пардохт накардани суди саҳмияҳои давлатӣ 65 ҳазор сомониро ташкил додааст.