315 ҳазору 600 сомонӣ-ҷарима барои фиреб додани истеъмолкунандагон

Душанбе, 11.07.2015. (АМИТ Ховар, Раъно Нусратуллозода).- Аз тарафи нозирон дар қаламрави ҷумҳурӣ дар 3 ҳазору 308 субъекти хоҷагидор санҷиш ва назорати қоидаҳои савдо (хизматрасонӣ) гузаронида шуд. Дар ин давра барои вайрон кардани қоидаҳои савдо, фиреб додани истеъмолкунандагон ва риоя накардани талаботи қонунгузории соҳа аз тарафи нозирон дар қаламрави ҷумҳурӣ дар 156  ҳолат ба маблағи умумии 315 ҳазору 600 сомонӣ қарорҳо оид ба бастани ҷаримаи маъмурӣ бароварда шуданд.  
Дар ин бора аз Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон хабар доданд.
Тибқи нақшаи чорабинӣ дар қаламрави ҷумҳурӣ барои баланд бардоштани маърифатнокии истеъмолкунандагон корҳои фаҳмондадиҳӣ анҷом дода шуда, ҳамзамон дар байни хонандагони  мактабҳои миёнаи таҳсилоти ҳамагонӣ, омӯзишгоҳҳо  ва мактабҳои олӣ дар асоси нақшаи чорабиниҳо якҷоя бо намояндагони Хадамоти зиддиинҳисории назди Ҳукумати Ҷумҳурии Тоҷикистон вохӯриҳо гузаронида шуданд.