387 медали варзишгарони тоҷик аз мусобиқаҳои байналмилалӣ

Душанбе, 21.07.2015 (АМИТ «Ховар», Фарзонаи Давлат).-Варзишгарон, аъзои дастаи мунтахаби Тоҷикистон  дар шаш моҳи соли равон оид ба намудҳои мухталифи варзиш дар 42 мусобиқаи ҷаҳонӣ, Осиё, Ҷоми ҷаҳон, Гран При ва мусобиқаҳои байналмилалӣ ширкат варзида, 387 медал ба даст оварданд. Ин нуктаро имрӯз, 21-уми июл Ахтам Абдуллозода, раиси Кумитаи ҷавонон, варзиш ва сайёҳӣ зимни нишасти хабарӣ иброз дошт.
Бино ба гуфтаи мавсуф, аз ин медалҳо 132-тояш  тилло, 125 адад нуқра ва 130 ададаш биринҷӣ мебошад, ки нисбат ба нимсолаи аввали соли гузашта варзишгарони тоҷик дар 8 мусобиқаи байналмилалӣ иштирок намуда, 62 медал  зиёдтар ба даст овардаанд.
Ба таъкиди Абдуллозода, дар дохили кишвар дар нимсолаи аввали соли ҷорӣ 36 чорабинии варзишӣ, аз ҷумла 12 чемпионати ҷумҳуриявӣ, 24 мусобиқаи сатҳи ҷумҳуриявӣ баргузор гардид, ки нисбат ба ҳамин давраи  соли 2014 16 чорабинии варзишӣ зиёд мебошад. 
-Дар чорабиниҳои варзишии дар кишвар гузаронидашуда 2680  варзишгар аз дохил ва хориҷи кишвар иштирок дошта,  ғолибон ва ҷоизадорон бо медалу диплом ва туҳфаҳои арзишманди Кумитаи ҷавонон, варзиш ва сайёҳӣ сарфароз гардонида шуданд,- гуфт Аҳтам Абдуллозода, раиси Кумитаи ҷавонон, варзиш ва сайёҳӣ дар ҷамъбасти нимсолаи фаъолияти кумита ба хабарнигорон.