43 донишҷӯи ДДОТ тибқи квотаи президентӣ таҳсил мекунад

Душанбе, 8.07.2015. (АМИТ «Ховар», Раъно Нусратуллозода).- Дар соли равон тибқи квотаи президентӣ аз манотиқи гуногуни кишвар дар Донишгоҳи давлатии омӯзгории Тоҷикистон ба номи Садриддин Айнӣ 43 нафар ба таҳсил фаро гирифта шуд. Дар ин хусус ректори донишгоҳи мазкур Носирҷон Салимӣ имрӯз зимни нишасти матбуотӣ ба хабарнигорон иттилоъ дод. 
Зикр шуд, ки зиёда ба 5 ҳазору 333 нафар донишҷӯи бахши рӯзонаи донишгоҳ беш аз 600 нафар омӯзгор, ки аз он 39 нафараш доктори илм, профессор, 3 нафар доктори илм, дотсент, 7 нафар номзади илм ва  профессоранд, дарс мегӯянд.
Инчунин дар донишгоҳи мазкур 7 ҳазору 150  нафар донишҷӯ дар бахши ғоибона ба таҳсил фаро гирифта шудааст. Донишгоҳ  дорои 13 факулта буда, дар онҳо аз рӯи 57 номгӯи ихтисос мутахассис тайёр  мешавад. Шумораи кафедраҳои тахассусӣ 44 адад буда, кафедраҳои умумидонишгоҳӣ ба 8 адад мерасад. Инчунин донишгоҳ  дорои боғи агробиолабораторӣ мебошад, ки он дар майдони 20,5 гектар доман паҳн кардааст.
Мавриди зикр аст, ки дар донишгоҳ аз кишварҳои хориҷӣ 16 нафар донишҷӯ дар бахшҳои мухталиф таҳсил дорад.