87 мошин ба мақомоти ҳифзи ҳуқуқи Тоҷикистон тақдим гардид

Душанбе, 8.07.2015. (АМИТ «Ховар»).-Имрӯз дар қисми ҳарбии 2611-и Сарраёсати қӯшунҳои сарҳадии КДАМ маросими ба мақомоти ҳифзи ҳуқуқ ва қӯшунҳои сарҳадии кишвар  супоридани кумакҳои техникӣ, аз қабили воситаҳои нақлиёти тамғаи «Тайота-Хайлюкс» ва микроавтобусҳои «Тайота-Хайс» аз ҷониби Сафорати Иёлоти  Муттаҳидаи Амрико дар Тоҷикистон баргузор гардид.
Дар чорабинӣ муовини аввали раиси Кумитаи давлатии амнияти миллии Ҷумҳурии Тоҷикистон Мансур Умаров, сафири ИМА дар Тоҷикистон хонум Сюзан Эллиотт иштирок доштанд.
Зикр шуд, ки ин воситаҳои нақлиёт барои мустаҳкам намудани имкониятҳои техникии қӯшунҳои сарҳадӣ ва мубориза бар зидди ҷиноятҳои фаромиллӣ, аз қабили терроризм, экстремизм ва қочоқи маводи мухаддир мусоидат менамоянд.
Сюзан Эллиотт зикр кард, ки Дафтари ҳамкориҳои ИМА ҳамчун кумаки техникӣ 87 мошинро ба маблағи 5 миллион доллари амрикоӣ ба Вазорати корҳои дохилии Ҷумҳурии Тоҷикистон, Сарраёсати Қӯшунҳои сарҳадӣ, Кумитаи давлатии амнияти миллии Ҷумҳурии Тоҷикистон ва Агентии назорати маводи нашъаовари назди Президенти Ҷумҳурии Тоҷикистон тақдим намудааст.
Зикр гардид, ки ИМА барои ҳамшарикони худ дар мубориза бар зидди гардиши ғайриқонунии маводи мухаддир ва дигар чолишҳо мусоидат намуда, уҳдадор аст, ки ҷиҳати беҳтар намудани иқтидори мақомоти ҳифзи ҳуқуқ кумак расонад. 
Дар ин бора Муҳаммад Улуғхоҷаев, котиби матбуотии Сарраёсати қӯшунҳои сарҳадии КДАМ ҶТ хабар дод.