Афзоиши истеҳсоли маҳсулоти саноатӣ дар нимсолаи 2015

Душанбе, 30.07.2015. (АМИТ «Ховар», Фарзонаи Давлат).-Маҷмӯи маҳсулоти дохилӣ дар нимсолаи аввали соли равон ба 19,2 млрд сомонӣ ва суръати афзоиши 6,4 дарсад баробар гардид. Ин нуктаро дирӯз, 29-уми июл вазири рушди иқтисод ва савдои Тоҷикистон  Неъматулло Ҳикматуллозода зимни ҷамъбасти фаъолияти нимсолаи вазорат иброз дошт.
Ба иттилои мавсуф, нисбат ба ҳамин давраи соли гузашта ҳаҷми истеҳсоли маҳсулоти саноатӣ 14,2 дарсад зиёд мебошад. Ҳамчунин ӯ гуфт, истеҳсоли маҳсулотӣ кишварзӣ 6,9 дарсад, гардиши савдои чакана 10,9 дарсад ва маблағгузорӣ ба сармояи асосӣ 41,4 дарсадро ташкил додааст.
-Дар ин давраи ҳисоботӣ ҳаҷми маҳсулоти саноатии кишвар ба 5 млрд. 415,5 млн сомонӣ, аз ҷумла саноати истихроҷ 683,8 млн сомонӣ, саноати коркард 3 млрд. 378,7 млн сомонӣ, неруи барқ, газ  ва об ба 1 млрд. 352,9 млн сомонӣ баробар гардид,-гуфт Неъматулло Ҳикматуллозода ба хабарнигорон.