Алӣ Қарадоғӣ: “Имкони ҷалби сармояи кишварҳои исломӣ дар Тоҷикистон мавҷуд аст”

Душанбе, 24.07.2015 (АМИТ «Ховар», Лайло Тоирӣ).- Дар доираи Конфронси байналмилалии «Ислом зидди экстремизм ва терроризми динӣ», ки дар шаҳри Душанбе доир шуд, 23 июли соли равон дар Бонки миллии Тоҷикистон бо иштироки роҳбарони ташкилоти қарзии ҷумҳурӣ мулоқот бо дабири кулли Иттиҳоди ҷаҳонии уламои мусалмони Давлати Қатар доктор Алӣ Муҳиддин ал-Қарадоғӣ баргузор гардида, масъалаи  имкониятҳои ҷалби сармояи кишварҳои исломӣ мавриди баррасӣ қарор гирифт.
Муовини якуми раиси Бонки миллии Тоҷикистон Ҷамолиддин Нуралиев изҳор дошт, ки низоми бонкии ҷумҳурӣ омодааст ҳамкории дуҷонибаи судмандро бо сармоягузорони Давлати Қатар дар мавриди ташкили бонкҳо ва дигар муассисаҳои қарзии исломӣ ба роҳ монад.
Доктор Алӣ Қарадоғӣ гуфт, ки: «Дар Тоҷикистон бо ташкили бонкдории исломӣ метавон ҳамкориро бо сармоягузорони кишварҳои араб вусъат бахшид». Номбурда зикр кард, ки дар Тоҷикистон  имконияти хуби ташкили як бонки бузурги исломӣ бо сармояи аз 100 то 500 млн. долл. ИМА бо иштироки ҷониби Тоҷикистон ва сармоягузорони Қатар вуҷуд дорад. “Аз ҷониби худ ман дар ҷалби сармоягузорони кишварҳои араб ва пешниҳоди намунаи санадҳои меъёрию ҳуқуқии таъсиси бонки исломӣ саҳми худро хоҳам гузошт. Мо ҳамчунин омодаем гурӯҳи кории шуморо дар Қатар бипазирем ва оид ба масъалаи номбурда машваратро оғоз кунем”, -илова намуд Алӣ Қарадоғӣ .
Илова гардид, ки бонкҳои исломӣ метавонанд дар ин ҷо филиалҳои худро кушода, фаъолият намоянд, заминаҳои таъсиси ташкилоти сармоягузорӣ. ба монанди ширкатҳои кафолатӣ (суғуртавӣ) ва ҳамчунин ташкили муассисаҳои маблағгузории хурд вуҷуд доранд. Сармоягузорони  Давлати Қатар дар музокироту машваратҳои минбаъда омодагии худро барои  вусъат бахшидани ҳамкории дуҷониба изҳор хоҳанд кард»,- бовар намуд  доктор Алӣ Қарадоғӣ