Ҳалокати 28 нафар дар натиҷаи 43 ҳолати фавқулода

Душанбе, 14.07.2015. (АМИТ «Ховар», Лайло Тоирӣ).- Дар натиҷаи 43 ҳолати фавқулодаи дорои хусусияти табиӣ дар нимсолаи аввали соли 2015 28 (2014-27) нафар ба ҳалокат расидааст.  Аз ин шумора   5 ҳолати фавқулода ба ВМКБ, 10 адад  ба Хатлон, 10-то ба Суғд, 9-то Рашт, 5-то ба  Ҳисор, 4 адад ба Душанбе  рост меояд. Маблағи хисорот аз ҳолатҳои фавқулодаи табиӣ 174 млн. 318 ҳазору 200 сомониро  ташкил дод.
Тавре ки аз Кумитаи ҳолатҳои фавқулода ва мудофиаи гражданӣ иттилоъ доданд, сол ба сол афзоиш ёфтани ҳодисаҳои ғарқшавии одамон боиси ташвиш гардидааст. Ҳарчанд дар давоми се соли охир ба ин масъала диққати махсус дода мешавад ва қабл аз мавсими оббозӣ кумита тадбир меандешад, шумораи ғарқшудагон аз 31 нафар дар соли 2014 ба 54 нафар дар 6 моҳи соли равон расидааст.
          15 ҳодисаи раъду барқ ва зарбазанӣ ба одамон  ба қайд гирифта шуд, ки дар натиҷаи он 10 нафар фавтида, 7 нафар маҷрўҳ гардидааст.