Ҷавонони ҳушманди тоҷик бар зидди ифротгароиянд!

Душанбе, 14.07.2015. (АМИТ «Ховар», Некрӯзи Муҳаммадсодиқ).- Имрӯз, 14 — уми июн дар шаҳри Хоруғи Вилояти Мухтори Кӯҳистони Бадахшон дар мавзӯи «Мавқеи ҷавонон дар мубориза бар зидди равандҳои номатлуби ҷомеа: терроризм, экстремизм ва маводи нашъадор» семинари илмӣ — амалии ҷумҳуриявӣ оғоз шуд. 
Семинарро раиси ВМКБ Шодихон Ҷамшед оғоз намуда, дар мавзӯи терроризм ва ифротгароӣ сухан гуфт. Баъдан Аламшозода  Абдураҳмон Аламшо — муовини аввали вазири корҳои дохилӣ дар мавзӯи «Чораҳои  пешгирӣ ва мубориза  бар зидди амалҳои террористӣ » ҳарф зад. Баъдан раиси Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон Аҳтам Абдуллозода ҷавононро даъват кард, ки бояд ҳама якҷоя садди роҳи ҷавонони гумроҳ шаванд, то онҳо фирефтаи ҳар гуна гурӯҳҳои ифротӣ нагарданду барои Тоҷикистон хатар эҷод нанамоянд. Аҳтам Абдуллозода зикр намуд, ки ташкили чунин чорабиниҳо ба хотири боз ҳам  қавитар намудани дӯстии ҷавонон ва баланд бардоштани сатҳи ҷаҳонбинии онҳо мебошад. Меҳроҷ Ғуломов, раиси созмони ҷавонони Донишгоҳи давлатии Қӯрғонтеппа ба номи Н Хусрав дар мавзӯи «Амалҳои ба ном Давлати исломиро маҳкум месозем » ва Марзия Гекпаева, мудири Шуъбаи  кор бо занон ва оилаи мақомоти ичроияи маҳаллии ВМКБ дар мавзӯи  «Саҳми занон дар пешгирии гаравиши ҷавонон  ба ҳизбу ҳаракатҳои ифротӣ», Зарифзода Маҳмадзоир Зариф, сардори ХПҲ НҶ ВКД  ҶТ дар мавзӯи «Таҳлилхои оморӣ ва сабабу омилҳое, ки ҷавононро ба гурӯҳҳои экстремистию ифротгароӣ ҷалб мекунанд» андешаҳояшонро баён карданд. 
Ёдовар мешавем, ки  беш аз 150  ҷавон аз минтақаҳои гуногуни кишвар барои иштирок дар семинари илмӣ-амалӣ таҳти унвони «Мақомоти корҳои дохилӣ ва ҷавонон: ҳамкорӣ дар бартарафсозии ақидаҳои экстремистӣ- ифротгароӣ » бо шиори «Мо Бадахшон меравем » дар шаҳри Хоруғи Вилояти Мухтори Кӯҳистони Бадахшон қарор доранд.