Баҳои ғайриқаноатбахши Кумитаи забон ба рекламаҳои берунии пойтахт

Душанбе, 28.07.2015 (АМИТ «Ховар», Фарзонаи Давлат).-Гавҳар Шарофзода, раиси Кумитаи забон ва истилоҳоти назди Ҳукумати Ҷумҳурии Тоҷикистон ба рекламаҳои берунии пойтахт баҳои ғайриқаноатбахш дод. Ин баҳо имрӯз зимни нишасти матбуотии ин кумита бо хабарнигорон дода шуд.
Бино ба гуфтаи Шарофзода, он рекламаҳои беруние, ки дар кӯчаҳои шаҳри Душанбе овезон ҳастанд, аксарият хилофи Қонуни Тоҷикистон «Дар бораи забони давлатӣ» мебошанд. Ҳамчунин ӯ гуфт,  вобаста ба ин масъала гурӯҳи кории кумита дар чаҳор ноҳияи пойтахт дар якҷоягӣ бо намояндагони мақомоти дахлдор фаъолият бурда, камбудиҳои ҷойдошта вобаста ба рекламаҳои беруниро ошкор мекунанд.