Дар Шуғнон ду пули мошингузар ва ду пули пиёдагузар хароб шудааст

Душанбе, 17.07.2015 (НИАТ «Ховар»).- Аз рӯи маълумоти охирин дар ноҳияи Шуғнон дар натиҷаи обхезӣ ду пули мошингузар ва ду пули пиёдагузар хароб шудааст.
Бино ба иттилои раиси ноҳияи Шуғнон Азиз Гиёев, инчунин ба 20 гектар, аз ҷумла 8 гектар заминҳои корам ва 2 километр роҳҳои мошингард хисорот расидааст.
Дар натиҷаи ин офати табиӣ 39 хона пурра ва даҳҳо хонаҳои дигар қисман хароб гаштаанд. Хушбахтона, талафоти ҷонӣ ба қайд гирифта нашудааст.
Ёдовар мешавем, ки бо супориши Сарвари давлат Эмомалӣ Раҳмон комиссия махсус таъсис дода шуда, дар ҷойи ҳодиса қарор дорад.