Дар Сурия қаҳрамони дукаратаи ҷаҳон оид ба бокси тайӣ, ки ба ДИ пайваста буд, кушта шуд

Душанбе, 09.07.15. (АМИТ «Ховар). — Қаҳрамони  дукаратаи  ҷаҳон  оид  ба  бокси тайӣ  Валдет Гаши (Valdet Gashi), ки  баҳори соли  равон  ба  сафҳои  гурӯҳи  террористии  «Давлати  исломӣ» (ДИ)  дохил  шуда буд, дар  Сурия кушта  шуд. Дар  ин  бора RUDAW хабар  медиҳад.
Аз  ҳалокати  варзишгар  аҳли оилааш   нақл  карданд. Ба  гуфтаи онҳо, Гаши рӯзи  шанбеи 4  июл дар  вазъияти  номаълум  парронда шуд. Мавсуф  дар  сафҳои  ДИ  вазифаи  посбони ҳудуди  назди  сарҳади  Сурияю  Туркияро  ба  ҷо  меовард. Исломгароён  Гаширо барои  худнамоии  худ  низ  истифода  менамуданд: вай  аксҳои дорои унсурҳои ифротгароиро, ки ин, мувофиқи  нақшаи роҳбарияти  ДИ  мебоист аъзои  навро ба сафҳои созмонашон ҷалб мекард,  дар  саҳифаи худ  дар Фейсбук ҷой  медод. 
Моҳи  июн худи  ҷанговар аз иштирокаш  дар гурӯҳи террористӣ  хабар  дод. Варзишгари  Олмон  мебоист  моҳҳои  апрел  ва  май дар  Таиланд машқ  мекард, вале  ба  ҷойи  ин  ба Сурия  рафта, ба ДИ пайваст.