Дар ҷумҳурӣ 621 ҳазору 295 нафақагир аст

Душанбе, 13.07.2015. (АМИТ «Ховар», Раъно Нусратуллозода).- Имрӯз зимни нишасти матбуотии Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон  зикр гардид, ки дар ҷумҳурӣ теъдоди умумии нафақагирон то ҳолати 1 июли соли ҷорӣ  621  ҳазору 295 нафарро ташкил медиҳад, ки нисбат ба ҳамин давраи соли гузашта 4 ҳазору 427 нафар афзоиш ёфтааст. Андозаи миёнаи нафақаҳои меҳнатӣ дар ин давра 249 сомонӣ, нафақаҳои суғуртавӣ 352 сомонӣ, нафақаҳои иҷтимоӣ 124,7 сомонӣ ва дар маҷмӯъ андозаи миёнаи нафақа дар ҷумҳурӣ 230 сомониро ташкил медиҳад.  
Дар нишаст зикр гардид, ки аз ҷониби Хадамоти давлатии ташхиси тиббию иҷтимоии Вазорати  тандурустӣ ва ҳифзи иҷтимоии аҳолии Ҷумҳурии Тоҷикистон то 1 июли соли ҷорӣ зимни муоинаи такрорӣ гурӯҳи маъюбии 8 ҳазору 885 нафар тасдиқи худро наёфт ва аз ин теъдод бинобар расидан ба синни нафақавӣ 2 ҳазору 347 нафар ба нафақа аз рӯи синн гузаронида шуд. Пардохти нафақаи 6 ҳазору 538 нафари дигар, ки гурӯҳи маъюбиашон тасдиқ нагардид, пурра қатъ шуд. Дар айни замон 4 ҳазору 820 нафар гирандагони нафақа аз рӯи маъюбӣ дар сатҳи муоинаи такрорӣ қарор доранд ва пардохти нафақаи онҳо муваққатан боздошт гардидааст.