«Дороиҳои «Амонатбонк» афзудаанд»: Руҳуллоҳ Ҳакимзода

         Душанбе, 14.07.2015.(АМИТ «Ховар», Марзия Саидзода).-«Дороиҳои  Бонки давлатии амонатгузории Тоҷикистон «Амонатбонк» дар ин давра 2,1 миллиард сомониро ташкил додаанд, ки  дар қиёс ба аввали сол  17,6 %  афзудаанд». Ин матлабро Руҳуллоҳ Ҳакимзода-раиси Бонки давлатии  «Амонатбонк» дар ҷамъи хабарнигорон дар Душанбе иброз дошт.
   Зикр гардид, ки сармояи   умумии  «Амонатбонк» дар ин давра  240 миллион сомониро ташкил дода,  нисбат ба ҳамин давраи соли гузашта 19,4 % афзудааст.
    Р. Ҳакимзода афзуд, ки  новобаста ба теъдоди омилҳои  беруна ба низоми  бонкии кишвар  «Амонатбонк» фаъолияти худро дар нимсолаи соли равон  бо нишондиҳандаҳои назарраси молиявӣ  ҷамъбаст намуд. 
      Бояд тазаккур дод, ки  Бонки давлатии амонатгузории Тоҷикистон  аз куҳантарин бонкҳои кишвар маҳсуб шуда, ҳоло дар бонки мазкур 2 ҳазору 800 нафар корманд фаъолият дорад.