Х. Абдураҳимов: 4-5 нафар ҳамасола ба мактабҳои олии Беларус ба таҳсил фиристода мешавад

Душанбе,16.07.2015. (АМИТ «Ховар», Маҳинаи Собир).- Имрӯз  дар Кумитаи ҳолатҳои фавқулода ва мудофиаи гражданӣ бо хабарнигорон  нишасти матбуотӣ доир гардид. Нишастро  раиси  Кумитаи ҳолатҳои фавқулода ва мудофиаи гражданӣ  Хайриддин Абдураҳимов оғоз карда, оид ба ҷамъбасти натиҷаҳои фаъолияти кумита  дар нимсолаи аввали соли ҷорӣ сухан кард.
Дар мавриди ҳамкории кумита бо кишварҳои хориҷӣ  раиси кумита зикр намуд, ки Кумитаи ҳолатҳои фавқулода ва мудофиаи гражданӣ бо кишварҳои пешрафта кӯшиш менамояд  ҳамкориро дар сатҳи хуб ба роҳ монад. Имрӯз ин ниҳод бо Русия, Беларус, Қазоқистон, Озарбойҷон ва Қирғизистон ҳамкории зич дорад.
Тибқи иттилои Х. Абдураҳимов дар доираи ин ҳамкорӣ ҳар сол 4-5 нафар ба мактабҳои олии Беларус барои таҳсил фиристода мешавад. Аз соли 2014 инҷониб кумита дар маркази таълимӣ курсҳои кӯтоҳмуддати 40 рӯзаро ташкил намудааст, ки кормандони нав ба кор қабулгашта аз ин курсҳо мегузаранд. Дар оянда дар назар аст ин курсҳои кӯтоҳмуддат ба давраҳои 4- 5 моҳа табдил дода шаванд.