Хатлон: иҷрои қисми хароҷоти буҷети вилоят 96 % таъмин гардид

Кӯлоб, 14.07.2015. (АМИТ «Ховар», Сулаймони Хол).-Дар  вилояти Хатлон бо иштироки намояндагони ВАО нишасти матбуотӣ доир гардид. Раиси вилояти Хатлон Давлатшо Гулмаҳмадзода  аз дастовардҳои  соҳаҳои  иктисодиёт  ва иҷтимоиёти  вилоят дар 6 моҳи соли равон ба хабарнигорон маълумот дода,  афзуд, ки  иҷрои қисми  хароҷоти буҷети вилоят 96 % таъмин гардида,  ташкилоту муассисаҳои буҷетӣ 541 миллион сомонӣ  маблағгузорӣ шудаанд. Аз ҷумла, ба соҳаи маориф 299,3 миллион сомонӣ, тандурустӣ 124,9  миллион сомонӣ,  ҳифзи иҷтимоӣ 6,1 миллион сомонӣ, коммуналӣ 13,9 миллион сомонӣ, варзиш 1 миллион сомонӣ, фарҳанг 15 миллион сомонӣ  ва нақлиёту коммуникатсия 5.5 миллион сомонӣ ҷудо гардид. 
Инчунин зикр гардид, ки  дар ин давра 34 ҳазору 192  ҷойи кор ва барқароршуда муҳайё гардид, ки нисбат ба ҳамин давраи соли гузашта 6603 ҷойи кор зиёд мебошад.