Иштироки коршиносони динии минтақа ва ҷаҳон дар конфронси байналмилалӣ

Душанбе, 22.07.2015. (АМИТ «Ховар»).- Имрӯз дар Китобхонаи Миллии Тоҷикистон конфронси байналмилалии «Ислом зидди экстремизм ва терроризми динӣ»  шурӯъ гардид. Дар кори конфронс, ки пагоҳ низ ҷараён мегирад, зиёда аз 40 шахсияти рӯҳонӣ ва коршиноси варзидаи минтақа ва ҷаҳон аз Русия, кишварҳои арабӣ, Ҳинд, Аврупо ва дигар кишварҳо, ҳамчунин созмонҳои байналмилалӣ, ниҳодҳои динии кишварҳои минтақа ва ҷаҳон ширкат доранд.    Аз ҷумла  Шайх Алӣ Қарадоғӣ,  дабири кулли Иттиҳоди ҷаҳонии уламои мусулмон дар ин  конфронси    байналмилалӣ  ширкат ва суханронӣ мекунад. 
 Тавре ки аз Кумитаи оид ба корҳои дин, танзими анъана ва ҷашну маросими миллии назди Ҳукумати ҶТ иттилоъ доданд,     Шайх Алӣ Қарадоғӣ  дирӯз, 21 июл ба Душанбе омад.  Ӯро  дар фурудгоҳи байналмилалии  Душанбе Сайидмукаррам Абдулқодирзода, раиси Шӯрои уламои маркази исломии Тоҷикистон истиқбол гирифт.