Ҳисор омода ба ҷашн аст

Ҳисор, 23.07.2015. (АМИТ «Ховар», Ҳотами Шариф).- «Ҳамаи иншооти ҷашнӣ то рӯзи таҷлили сеҳазорсолагии Ҳисор, яъне моҳи октябри соли ҷорӣ ба истифода дода мешаванд»,-иброз дошт раиси ноҳияи Ҳисор Усмон Раҳмонзода зимни нишасти хабарӣ, ки 22 июл дар ноҳияи Ҳисор доир гардид. 
Воқеан имрӯз  симои шаҳраки Ҳисор ва умуман ҳудуди ноҳия тадриҷан дигар гашта, Ҳисор ба таври замонавӣ зеботар гаштааст. Раиси ноҳия бо бовари комил иброз дошт, ки ғайр аз иншооти бузург- варзишгоҳ, Қасри фарҳанг, осорхона, китобхона, чойхонаи миллӣ, мактаби президентӣ, боз  беш аз 200 иншооти ҷашнии дигар бо сифати баланд ва симои замонавӣ ба истифода дода хоҳад шуд.  
«Ман бовар дорам, ки баъди ҷашни сеҳазорсолагии Ҳисор ҳам корҳои ободонӣ дар тамоми ҳудуди ноҳия босуръат идома хоҳанд ёфт»,-афзуд У. Раҳмонзода.
Бо ибтикори раиси ноҳия гурӯҳи хабарнигорон қабл аз нишаст аз иншооти ҷашнӣ дидан карда, бо ҷараёни корҳо дар сохтмонҳо  ошно шуданд.