Истироҳати бофароғат дар «Кайҳон»

Душанбе 01.07.2015. (АМИТ «Ховар», Фарзонаи Давлат).-Дирӯз фароғатгоҳи «Кайҳон» дари худро ба рӯи фарзандони кормандони соҳаи авиатсияи кишвар расман боз кард.
Бино ба иттилои М. Шодиев, котиби матбуотии «Фурудгоҳи байналмилалии Душанбе», имсол фароғатгоҳ дар се баст фаъолият карда, барои кор бо кӯдакону наврасон мутахассисони варзида даъват шудаанд. Ҳайати педагогӣ аз 13 нафар иборат буда, сармураббӣ, духтур, ҳамшираҳои шафқат, кормандони техникӣ ба кор ҷалб шудаанд.
Гуфта мешавад, дар басти аввал 150 нафар, аз ҷумла, 10 нафар тарбиягирандаи Хона-интернати ҷумҳуриявии ноҳияи Шаҳринав истироҳат хоҳанд кард. Маъмурияти фурудгоҳ ва Кумитаи иттифоқи касабаи кормандони авиатсия тасмим гирифтаанд дар бастҳои дигар низ аз хона-интернатҳои ҷумҳурӣ фарзандони нафарони камбизоатро ба таври ройгон барои истироҳат ҷалб намоянд.