Кӯлоб: қисмати зиёди роҳҳо таъмир гардиданд

Кӯлоб, 14.07.2015. (АМИТ «Ховар», Сулаймони Хол).-Муассисаи давлатии «Идораи хоҷагии роҳҳои мошингарди  минтақаи Кӯлоб» таъмири 2 398,43 км роҳҳои  истифодаи умумиро  бар зимма дошта, то ин давра қисми зиёди роҳҳоро аз таъмири ҷорӣ баровард,- гуфт сардори муассисаи мазкур Рустам Валиев. Ба гуфтаи мавсуф, дар шаш моҳи соли равон ба воситаи  муассисаҳои зертобеъ 454 км  роҳи мошингард аз таъмири асосӣ   бароварда шуд, ки маблағи умумӣ дар ҳамаи  бахшҳои роҳсозӣ 4 млн. 650 ҳазору 401 сомониро ташкил медиҳад.  Дар ин давра аз ҷониби кормандон  10 адад пул ба дарозии  128 м, 8 адад қубур ба дарозии 113 м таъмиру барқарор гардида, инчунин 8,84 км роҳҳои мошингард аз таъмир бароварда шуданд. 
Аз ҳисоби  маблағҳои Вазорати нақлиёт  дар минтақаи Кӯлоб  корҳои соҳилмустаҳкамкунӣ  дар пули 14 км-и  роҳи мошингарди Кӯлоб- Муъминобод, Қурғонтеппа -Данғара  ба маблағи 98 ҳазору 161 сомонӣ  ба итмом расида, ҳоло корҳои соҳилмустаҳкамкунӣ ва таъмири роҳҳо  дар роҳҳои мошингарди Данғара-Кангурт- Балҷувон, барқарорсозии роҳҳои мошингарди  Душанбе- Кӯлоб- Хоруғ ва барқарорсозии  роҳҳои Восеъ, Фархор, Ҳамадонӣ идома доранд.