Кумаки Сарвари давлат ба зарардидагони мавзеи осебдидаи Шуғнон

Душанбе, 20.07.2015.(АМИТ «Ховар»).-Имрӯз бо супориши Сарвари давлат Эмомалӣ Раҳмон аз ҳисоби Агентии захираҳои моддии давлатии назди Ҳукумати Ҷумҳурии Тоҷикистон ба зарардигони мавзеи осебдидаи деҳаҳои ноҳияи Шуғнон кумаки ғизоӣ фиристода шуд. Ин кумак аз 5 тонна орд ва 2 тонна маводи ғизоӣ, аз қабили биринҷ, қанду равған иборат аст. 
Тавре ки хабарнигори АМИТ «Ховар» аз маҳалли осебдидаи ВМКБ  иттилоъ медиҳад, аз оғози рух додани ин ҳодиса 3 чархболи қувваҳои ҳарбӣ-ҳавоии Вазорати мудофиаи Ҷумҳурии Тоҷикистон дар маҳалли осебдида  дар хизмати сокинони ин мавзеъ қарор дорад. 
Ба иттилои Алишер Лолазода, сарнишини яке аз ин чархболҳо, дар тӯли ин муддат ҳар як чархбол беш аз 30 маротиба парвоз анҷом дода, ҳам барои кӯчонидани мардум аз мавзеи осбдида, ҳам барои бурдани беморон ба марказҳои тиббӣ ва ҳам барои дастрас намудани маводи ғизоӣ ва дигар лавозимоти зарурӣ хизмат намудааст.