Мусофирони Mercedes дар дарёи Фон бедарак шуданд

Душанбе, 01.07.2015. (АМИТ  «Ховар», Лайло Тоирӣ).- Мусофирон  Гулҷаҳон Ҳусейнова, соли таваллудаш 1986, Майрам Ҳусейноваи 2-сола ва Салмон Ҳусейнови 4-сола, сокинони ноҳияи Зафаробод бо мошини тамғаи Mercedes ба дарёи Фон сарозер гардида,   бедарак  шудаанд.
Тавре ки аз хадамоти матбуоти Кумитаи ҳолатҳои фавқулода ва мудофиаи граждании ҷумҳурӣ иттилоъ доданд,  30 июни соли равон тақрибан соатҳои 17-00 дар километри 95-уми шоҳроҳи мошингарди Хуҷанд -Душанбе дар мавзеи деҳаи Такфон, ҷамоати деҳоти Анзоби ноҳияи Айнӣ мошини тамғаи Mercedes,  рақами давлатиаш 2816 ВС 01 РТ, ки аз самти Хуҷанд ба тарафи Душанбе ҳаракат мекард, бо сабабҳои номаълум ба дарёи Фон афтид. 
Дар натиҷа ронанда Баҳридин Сатторов осеб наёфта, мусофир  Азизмурод Ҳусейнов, сокини ноҳияи Зафаробод дар беморхона бистарӣ гардид. Дар бораи се мусофири дигар ягон иттилоъ нест.