Мусоидати СБМ барои имтиҳонсупории 4 муҳоҷир

 Душанбе, 24.07.2015. (АМИТ «Ховар», Лайло Тоирӣ).-  Бо  мусоидати  Созмони Байналмилалии Муҳоҷират 4 муҳоҷири меҳнатӣ имтиҳонҳои забони русӣ, таърих ва асосҳои қонунгузории Федератсияи Русияро  ройгон ва бомуваффақият супориданд.
Инҳо Дӯстмурод Абдиев, сокини  ҷамоати деҳоти И. Ниёзов, Ҷамшед Ғуломрасулов, сокини ҷамоати Носири Хусрав, Шаҳло Ҷабборова, сокини ҷамоати деҳоти Н. Хусрав  ва Бобур Исломов, сокини  ҷамоати деҳоти У. Назарови ноҳияи Қубодиён мебошанд. 
Бино ба иттилои Хадамоти муҳоҷират,  ҳамкории Хадамоти муҳоҷират бо Созмони Байналмилалии Муҳоҷират сол то сол густариш ёфта, Маркази мусоидат ба муҳоҷирон аз тарафи СБМ дар Тоҷикистон ташкил  шудааст.
Бахши Хадамоти муҳоҷират дар ноҳияи Қубодиён ният дорад минбаъд низ ҳамкории судмандро бо Созмони Байналмилалии Муҳоҷират ба роҳ монда, барои  омодагии пеш аз сафари муҳоҷирон, таълими касбии онҳо, омўзиши забони русӣ, таърих ва асосҳои қонунгузории Федератсияи Русия мусоидат намояд.