Музди миёнаи меҳнат 5,5 фоиз афзуд

Душанбе, 16.07.2015. (АМИТ «Ховар», Лайло Тоирӣ).-Музди миёнаи меҳнат дар ҷумҳурӣ то 1 майи соли равон 884 сомониро ташкил дод, ки нисбат ба ҳамин давраи соли гузашта 5,5 фоиз афзудааст. Ин нуктаро имрӯз зимни нишасти матбуотӣ вазири меҳнат, муҳоҷират ва шуғли аҳолӣ Сумангул Тағойзода ироа намуд. 
Музди меҳнати баланд  дар бахши воқеӣ дар соҳаҳои сохтмон-1747 сомонӣ, неруи барқ, газ ва таъминоти об — 1301 сомонӣ ва музди меҳнати паст дар соҳаи кишоварзӣ 282 сомонӣ ба қайд гирифта шудааст. 
«Дар бахши хизматрасонӣ музди меҳнати баланд дар соҳаи фаъолияти молиявӣ 2295 сомонӣ буда, музди меҳнати паст дар соҳаҳои буҷавӣ, аз ҷумла, тандурустӣ 659 сомонӣ, маориф-694 сомонӣ, фарҳанг ва варзиш 883 сомонӣ ва мақомоти идоракунӣ 922 сомонӣ  ба қайд гирифта шудааст»,-илова намуд вазир.