Н.Салимӣ: Донишномаҳои фаннӣ интишор мешаванд

Душанбе, 9.07.2015. (АМИТ «Ховар», Раъно Нусратуллозода).-Мо бояд тарзу услуби тарҷумаи китоби дарсиро омӯзем. Дар ин самт анҷоми баъзе нақшаҳо дар назар аст. Барои мисол метавон гуфт, ки дар оянда хатмкунандагони риштаи магистратура то замоне, ки як китобро тарҷума накунанд, ба имтиҳоноти ниҳоӣ роҳ дода нахоҳанд шуд. Дар ин бора ректори Донишгоҳи давлатии омӯзгории Тоҷикистон ба номи Садриддин Айнӣ Носирҷон Салимӣ 8 июл зимни нишасти матбуотӣ хабар дод.
Дар таълимгоҳ аз ҳисоби омӯзгорони соҳибтаҷрибаю собиқадор ва соҳибунвон гурӯҳи корӣ таъсис шудааст, ки он ба таълиф ва таҳияи донишномаҳои фаннӣ машғул аст. Масалан, аз фанҳои химия, физика, биология, математика, география, таърих, адабиёт дар алоҳидагӣ донишнома барои донишҷӯён интишор мегардад, ки тамоми маълумотро перомуни фанҳои мазкур фарогир мешавад. Н.Салимӣ дар хусуси нашри китоби дарсӣ ва кори тарҷумонӣ  иброз дошт, ки як нафар донишҷӯи факултаи забонҳои романӣ-германӣ барои омӯзиши забони фаронсавӣ китоби дарсӣ навишт ва ин китоб аз ҷониби сафорати Фаронса қабул гардида, барои нашраш маблағгузорӣ шуд.