Наворбардории се филм аз ҷониби «Тоҷикфилм» ба анҷом расид

Душанбе, 11.07.2015. (АМИТ «Ховар», Ситораи Боймурод).- Тибқи иттилои Кумитаи телевизион ва радиои назди Ҳукумати Ҷумҳурии Тоҷикистон бо мақсади дастгирии мутахассисони ҷавон ва коромӯз, омода намудани кадрҳои соҳа Киностудияи давлатии «Тоҷикфилм» наворбардории чор филми кӯтоҳро бо иштироки шунавандагони курси «Сенаристони ҷавон» ва курси режиссёрии Донишкадаи давлатии санъати Тоҷикистон ба нақша гирифта буд, ки аз онҳо аллакай се филми кӯтоҳ — «Эълон», «Хобидан мехоҳам» ва «Умри Хайём» наворбардорӣ, таҳия ва танзим шуданд.
Гуфта мешавад, ки ба муносибати Соли оила эълон гардидани соли 2015 Киностудияи «Тоҷикфилм» таҳияи филми мустанади «Рози тавлид»-ро дар коргардонии Робия Атоева пурра ба анҷом расонид. Дар коргоҳи анниматсионӣ  таҳияи филми «Ҳамсояҳо» (дар 3 қисм) дар шакли 3D ба анҷом расонида шуд. Наворбардории филми ҳунарии «Садбарг»  дар шаҳру навоҳии ҷумҳурӣ ба анҷом расида,  давраи танзими он оғоз гардид.