Омилҳои вобаста ба 29 ё 30 рӯз давом кардани Моҳи Рамазон кадомҳоянд?

Душанбе, 13.07.2015. (АМИТ «Ховар»). — Рўзи аввали ҳар моҳ дар ин солшумории ҳиҷрии қамарӣ бар асоси моҳи нав дар шомгоҳи рўзи 29 ё 30-уми моҳи қаблӣ таъйин мешавад, ки онро мушоҳида ё пешбинии мушоҳидапазирии ҳилол меноманд. Пешбинии вазъияти рўъяти ҳилол дар моҳҳои қамарӣ ба мавқеи ҷуғрофии кишварҳо дар лаҳзаи ғуруби рўзи 29-уми моҳ вобастагӣ дорад ва эҳтиёткории нозуконаро тақозо менамояд. Имконияте вуҷуд дорад, ки ҳилоли моҳи нав дар як мавзеи кураи Замин рўзи 29-ум баъди ғуруби Офтоб дида шавад, вале дар макони дигар дида нашавад. Ин ҳолат сабаби ихтилофи якшабонарўзӣ дар кишварҳои мусулмонӣ аз нигоҳи гоҳшумории ҳиҷрии қамарии ҳилолии маҳаллӣ мешавад. Мутобиқи ҳукми шаръӣ агар ҳилоли моҳ дар шомгоҳи рўзи 29-уми моҳ дида шавад, он моҳ поёнрасида ва фардо аввали моҳи баъдӣ аст.
Аз ин лиҳоз, 29 рӯз доштани рӯза вобаста ба пайдо шудани ҳилоли моҳи нав ва мушоҳидаи он аз ҷониби мутахассисони соҳа тасдиқ мешавад.