Парлумонҳои Тоҷикистону Лаҳистон дар таҳкими равобити дуҷониба нақши калидӣ мебозанд

         Душанбе, 03.07.2015.(АМИТ «Ховар», Марзия Саидзода).- «Парлумонҳои Тоҷикистону Лаҳистон дар таҳкими равобити дуҷониба нақши калидӣ мебозанд», гуфт дар ҷараёни мулоқоташ Акрамшо Фелалиев-муовини раиси Маҷлиси намояндагон бо Ежи Вендерлих -ноиби раиси Сейми /Парлумон/-и Лаҳистон.
   Дар мулоқот мусоҳибон  ба масъалаи густариши  ҳамкории  байнипарлумонӣ  миёни палатаи поёнии Парлумони Тоҷикистон ва  Сейми Лаҳистон дахл намуданд. А. Фелалиев изҳор дошт, ки миёни  парлумонҳои  ҳарду кишвар гурӯҳҳои дӯстӣ ва ҳамкорӣ амал  мекунанд ва ташрифи  гурӯҳи дӯстии Сеймии Лаҳистон ба Тоҷикистон самараи мулоқоту вохӯрии сарони кишварҳои  Тоҷикистону Лаҳистон аст. 
Зикр шуд, ки сафари намояндагони парлумонҳои Тоҷикистону Лаҳистон ба кишварҳои якдигар барои рушди муносиботи байнипарлумонии ҳар ду кишвар мусоидат намуда, дар самти истифодаи таҷрибаи ҳамдигар ҷиҳати таҳия ва омода  намудани қонун ва дигар санадҳо кумак хоҳад кард.
Таъкид гардид, ки байни ду кишвар имконоти зиёди ҳамкорӣ дар бахшҳои равобити байнипарлумонӣ, иқтисоду тиҷорат, илму  маориф,  кишоварзӣ ва  фарҳангӣ вуҷуд дорад.
Дар мулоқот ҳамчунин масоили вобаста ба таҳкими ҳамкории байни ду кишвар ва вазъи минтақа мубодилаи афкор ҷараён гирифт.
Ежи Вендерлих хостори  густариши равобити парлумонии  Лаҳистон бо Тоҷикистон шуда, гуфт, ки яке аз ҳадафи асосии ташрифи  ҳайати парлумонии Лаҳистон ба Душанбе баррасии  масоили  тавсеаи ҳамкорӣ, омӯзиши таҷрибаи парлумони Тоҷикистон дар самти  таҳия ва қабули қонуну қарор ва дигар  санадҳои  дорои аҳамияти  дохилӣ,  минтақавӣ ва байналмилалӣ мебошад.