Роҳбари гурӯҳи террористии «Толибон» Мулло Умар ду сол пеш кушта шудааст

Душанбе, 29.07.2015. (АМИТ «Ховар»). — Роҳбари гурӯҳи террористии «Толибон» Мулло Умар ду сол пеш кушта шудааст. Дар ин бора расонаҳои хабарии хориҷӣ бо такя ба манобеи худ хабар додаанд. 
Як манбаъ дар ҳукумати Афғонистон рӯзи 29 июл ба Радиои Озодӣ гуфтааст, ки Мулло Муҳаммад Умар — роҳбари ҷунбиши «Толибон»-и Афғонистон фавтидааст. Ин мавзӯъ рӯзи чаҳоршанбе дар як нишасти амниятӣ низ баррасӣ шуда, хабари даргузашти Мулло Умарро Покистон дар ихтиёри Кобул гузоштааст. 
Ин дар ҳолест, ки чанд рӯз қабл «Маҳоз Фидоӣ» — як гурӯҳи вобаста ба Толибон иддао карда буд, ки Мулло Умар ду сол пеш кушта шудааст. Ин гурӯҳ гуфта буд, ки Мулло Умар аз сӯи Мулло Ахтар Муҳаммад Мансур, дӯст ва муовинаш ба қатл расида буд. Ба гуфтаи Қорӣ Ҳамза, сухангӯи гурӯҳи «Маҳоз фидоӣ», онҳо санад ва мадраке дар даст доранд, ки метавонанд собит кунанд, ки Мулло Муҳамад Умар дигар зинда нест.