Сафҳаи форсии сомонаи нави “Ховар” фаъол шуд

Душанбе, 20.07.2015. (АМИТ «Ховар»).-Бахши форсии сомонаи расмии Агентии миллии иттилоотии Тоҷикистон «Ховар»-и назди Ҳукумати Ҷумҳурии Тоҷикистон дар таҳияи нав ба шабакаи ҷаҳонии Интернет баромад.
Бахши форсӣ мисли бахшҳои тоҷикӣ ва русию англисии сомонаи нави АМИТ «Ховар» бо истифода аз усулҳои навтарини барномасозии муосир ва мутобиқ ба меъёрҳои сомонаҳои хабарии ҷаҳонӣ таҳия шуда, аз шакли қаблӣ бо тарҳ ва имконоти фаровони дастрасии осону фаврӣ ба хабарҳо фарқ мекунад. 
Мавриди зикр аст, ки тамоми мавод бо фаврияти баланд ва саҳеҳият дар сомонаи расмии АМИТ «Ховар» бо се забон — тоҷикӣ, русӣ, англисӣ ва ҳуруфоти форсӣ ҷойгир мешаванд. Инчунин рӯзҳои наздик мавод бо забонҳои арабӣ низ ҷой дода хоҳанд шуд. Дар ояндаи наздик ба кор даровардани бахши чинӣ низ дар назар аст.