«Сармоягузорӣ ба Тоҷикистон- имкониятҳо барои ҳамкории созанда»-форуми байналхалқӣ

Душанбе, 28.07.2015. (АМИТ «Ховар», Ситораи Боймурод).- Дар соли 2015 баландшавии мавқеи мамлакат ба 11 зина аз ҳисоби баҳтаршавии нишондиҳандаҳои  бақайдгирии  моликият ба 3 зина, дастрасӣ ба қарз ба 62 зина ва андозбандӣ ба 15 зина муяссар гардид, -зикр шуд дар нишасти матбуотии Кумитаи давлатии сармоягузорӣ ва идораи амволи давлатии Ҷумҳурии Тоҷикистон.
Ба иттилои манбаъ, дар давраи ҳисоботӣ кумита фаъолияти худро ҷиҳати тақвият  бахшидан ба рушди соҳибкорӣ, шарикии давлат бо бахши хусусӣ равона кард. Дар ин замина устувории рушди бахши хусусӣ таъмин гардида аз рӯи маълумот ҳиссаи он зиёда аз 70 фоизи маҷмӯи маҳсулоти дохилиро ташкил медиҳад ва 64,5 фоиз теъдоди аҳолии фаъоли иқтисодиро ба шуғл фаро гирифтааст.
Дар рӯзи таҷлили нахустини «Рӯзи соҳибкор», яъне 14-уми октябри соли 2015 доир намудани Форуми байналмилалии Душанбе-2015 таҳти унвони «Сармоягузорӣ ба Тоҷикистон- имкониятҳо барои ҳамкории созанда» ба нақша гирифта шудааст.