Суғд: Коҳиши ҷиноятҳо вобаста ба нашъаҷаллобӣ

Душанбе,  13.07.2015. (АМИТ «Ховар», Тоҳирҷон Искандарзода).-  Дар самти мубориза бо муомилоти ғайриқонунии маводи нашъаовар аз ҷониби Раёсати Агентии назорати маводи нашъаовар дар вилояти Суғд дар нимсолаи аввали соли 2015 28 ҷиноят ошкор  шудааст, -хабар дод сардори Раёсат Музаффар Ҳотамӣ зимни   нишасти матбуотӣ, ки  имрўз доир гардид. Аз гардиши ғайриқонунӣ 131 кг 019 грамм маводи нашъаовар  мусодира шудааст, ки аз он 15 кг 422 граммашро навъи  ҳероин ташкил медиҳад. Барои содир намудани ин ҷиноятҳо 44 нафар ба ҷавобгарӣ кашида шудааст,  ки 6 нафар пеш судшуда ва 1 нафар шаҳрванди хориҷӣ мебошад.  Ҳамчунин  дар нимсолаи аввали соли 2015 аз ҷониби мақомоти ҳифзи ҳуқуқ  ва сохторҳои низомии вилояти Суғд 134 ҷинояти нашъаҷаллобӣ ошкор ва 305 кг 964 грамм маводи мухаддир мусодира шудааст. Маҷмуан дар вилояти Суғд дар қиёс ба  ҳамин давраи соли гузашта ҷиноятҳои марбут ба нашъаҷаллобӣ коҳиш ёфтаанд.