Террористони ДИИШ маводи мухаддир истеъмол мекунанд

Душанбе, 11.07.2015 (АМИТ «Ховар»).-Ба гузориши хабаргузории «Донишҷӯёни Эрон», ба нақл аз шабакаи «Ал-арабия», дар пайи ёфт шудани осори маводи мухаддир дар порчаҳои бадани террористоне, ки ба масҷиди Имом Содиқи Кувайт ҳамла намуда буданд, собит гардид, ки аъзои ДИИШ маводи мухаддир истифода мекардаанд.
Тибқи ахборе, ки мунташир шудааст, маводи мухаддири мазкур, ки «шиша» (кристалл) ном дорад, ниҳоят хатарнок буда, касе, ки як ё ду маротиба аз он истифода барад, ба он гирифтор муътод гардида, ба харобшавии тахайюлот мубтало мешавад. Яъне, ин модда ба системаи асаби инсон таъсири калон расонида, шахси мубтало он тахайюлотеро мебинад, ки дар воқеият вуҷуд надорад. Асаби инсони истеъмолкунандаи маводи «шиша» ба куллӣ хароб гардида, ӯ  метавонад ба куштани наздикон ва ҳатто худаш даст бизанад.