«Тоҷикаэронавигатсия» ба 125 ширкати ҳавопаймоӣ хизмат мерасонад

Душанбе, 23.07.2015. (АМИТ «Ховар», Лайло Тоирӣ).-КВД «Тоҷикаэронавигатсия» ба 125 ширкати ҳавопаймоии сохторҳои мухталифи ватаниву хориҷӣ хизмат мерасонад, ки аз он 17-тоаш ширкати иҷрокунандаи парвозҳои доимӣ ва 108-тоаш ширкати иҷрокунандаи парвозҳои ғайридоимӣ мебошад. Ин нуктаро имрӯз зимни нишасти матбуотӣ директори генералии КВД «Тоҷикаэронавигатсия» Иброҳим Ҷобиров ироа намуд. Бино ба гуфтаи И. Ҷобиров барои иҷрои парвозҳо аэродромҳои кишварамон 60 навъ киштии ҳавопаймоиро  истифода мебаранд. 
Бо мақсади нигаҳдошти сатҳу татбиқи муваффақонаи нақшаҳои истеҳсолӣ як зумра тадбирҳои зарурӣ, аз қабили маҷмўи корҳои омодагӣ барои кор дар давраи баҳору тобистон, таълими фаннии ҳайати шахсӣ, муҳокимаи ҳолати мухталиф аз ҷониби ҳайати роҳбарону кормандон, хизматрасонии фаннии воситаҳои таъминоти радиотехникӣ, санҷиши мавҷудият ва тамдиди муҳлати шаҳодатномаҳои коршоямӣ ва иҷозати ҳуқуқи истифодаи воситаҳои радионурафкан, истихбори хатҳои алоқавии воситаҳои таъминоти радиотехникӣ ва дигар тадбирҳои марбут ба баланд бардоштани омодагии ҳаматарафаи корхона татбиқ гардиданд.