Вуруди зиёда аз 90 млн. сомонӣ қарзи андоз ба буҷети давлат

Душанбе, 31.07.2015. (АМИТ «Ховар», Лайло Тоирӣ).- Дар самти қонунгузории андозу гумрук 260 санҷиши прокурорӣ амалӣ гардида, бо натиҷаи онҳо ҷиҳати бартараф намудани қонунвайронкуниҳо 2945 санади эътиноии прокурорӣ ба тасвиб расонида шуд, ки аз натиҷаи баррасии онҳо 7594 нафар ба ҷавобгарии интизомӣ, моддӣ ва маъмурӣ кашида шуда, 53 парвандаи ҷиноятӣ оғоз шуда, ҷиҳати кам кардани бақияпулиҳои қарзи андоз ба судҳо 46 аризаи даъвогӣ ба маблағи умумии 41,9 млн. сомонӣ пешниҳод шудааст, ки 28 даъво ба маблағи 13,1 млн. сомонӣ қонеъ гардида, 18 даъвои дигар дар баррасӣ қарор дорад. Дар ин бора имрӯз зимни нишасти матбуотӣ Прокурори генералии ҶТ Раҳмон Юсуф Аҳмадзод иттилоъ дод. 
Бино ба гуфтаи Прокурори генералӣ, баҳри кам кардани бақияпулиҳои қарзи андоз бо натиҷаи чораҳои эътиноии прокурорӣ зиёда аз 91 млн. сомонӣ қарзҳои андоз ба буҷети давлат ворид шуда, 20 парвандаи ҷиноятӣ оид ба пинҳон намудани 20 млн. сомонӣ андозҳо оғоз шудааст.