Амалиёти густурдаи поксозии гурӯҳҳои ифротӣ дар шимоли Афғонистон

Душанбе, 04.08.2015. (АМИТ «Ховар»). — Мақомоти қудратии Ҷумҳурии Исломии Афғонистон яке аз минтақаҳои муҳим дар вилояти Фарёб — Қароиро аз ҷангиёни гурӯҳи ифротии «Толибон» пок карданд.   
Бино ба иттилои расонаҳои хабарӣ, ин минтақа дар натиҷаи як амалиёти густурда бо истифода аз ҳавопаймоҳои ҷангӣ 3 август аз назорати толибон ба назорати нерӯҳои давлатӣ гузаштааст. 
Дар натиҷаи амалиёт беш аз 7 тан толибон нобуд ва чандин ҷанговарони он захмӣ шудаанд. 
Инчунин, ба нерӯҳои ҳукуматӣ муяссар шудааст, ки дар ин вилоят беш аз 20 рустои дигарро аз зулми толибон озод кунанд. 
Маврид ба ёдоварист, ки чанде қабл генерал Дӯстум, волии вилояти Балх Ато Муҳаммади Нур ва муовини раиси иҷроияи Афғонистон Ҳоҷӣ Муҳаммад Муҳаққиқ ба хотири поксозии шимоли Афғонистон аз гурӯҳҳои ифротӣ эътилоф таъсис карда буданд.