Баррасии амалисозии Барномаи минтақавӣ дар АНМН

Душанбе, 20.08.2015 (АМИТ «Ховар», Фарзонаи Давлат).- Директори  Агентии назорати маводи нашъаовари назди Президенти ҶТ Рустам Назарзода бо ҳамоҳангсози калони Барномаи минтақавӣ барои Афғонистон ва кишварҳои ҳамсояи Раёсати СММ оид ба маводи нашъаовар ва ҷинояткорӣ ҷаноби Ҷереми Милсон мулоқот кард. 
Дар мулоқот  рафти амалисозии Барномаи минтақавӣ барои Афғонистон ва кишварҳои ҳамсоя, натиҷаҳои он дар марҳилаи аввал баррасӣ шуда, зикр гардид, ки диққати асосӣ ба мустаҳкам намудани ҳамкории мақомоти Тоҷикистону Афғонистон, гузаронидани амалиётҳои муштарак, чорабиниҳои пешгирикунанда дар ноҳияҳои наздисарҳадӣ равона карда шавад. 
Дар робита ба ин пешниҳод шуд, ки таҷрибаи омӯзонидани кормандони Агентӣ доир ба масъалаҳои ошкор намудан ва бурдани тафтишоти ҷиноятҳои вобаста ба қонунигардионии маблағҳои пулӣ, ки дар натиҷаи фаъолияти ҷиноятпеша ба даст омадаанд, мубодилаи саривақтии иттилоот оид ба дохил кардани тағйирот ба “Рӯйхати миллии воситаҳои нашъадор, маводи психотропӣ ва прекурсорҳо” давом дода шавад. 
Дар анҷоми мулоқот тарафҳо изҳори бовар намуданд, ки ҳамкориҳо дар оянда боз ҳам мустаҳкам хоҳанд гардид.